ഞാൻ ചത്ത്‌ പൊങ്ങിയത്

ഞാൻ ചത്ത്‌ പൊങ്ങിയത്
നിങ്ങളുടെ സ്വപ്നങ്ങൾക്ക്
പട്ടു നൂലിഴ നല്കാനായിരുന്നു....
ഓരോ ദിനവും
മരണത്തിന്റെ മന്ത്രവുമായി
എന്നിലേക്ക്‌ ഓടി അടുത്തു...
നിങ്ങളുടെ സ്വപ്‌നങ്ങൾ
പട്ടുനൂൽ ചിറകുകളിൽ പറന്നു പൊങ്ങി...
വർഷങ്ങൾ നിമിഷങ്ങളെ പോലെ ഒടുങ്ങി തീർന്നു...
വികൃതമായ പുഴു ശരീരത്തിലെ
അവസാന പട്ടു നൂലും നല്കി
ഞാൻ ഒരു പുതപ്പിന്റെ സാന്ത്വനം തേടി
നിങ്ങളുടെ കണ്ണുകളിലേക്കു നോക്കി...
അവിടെ ഞാൻ കണ്ടത്
പട്ടു നൂലിന്റെ മൃദുത്വമല്ല...
കത്തുന്ന അവജ്ഞ...
പുഴു ശരീരത്തിന്റെ വൈകൃതതിലേക്ക്
നിങ്ങളുടെ കണ്ണുകൾ ആഴ്ന്നിറങ്ങിയപ്പോൾ...
ഞാനൊരു നിമിഷം എന്റെ
യൌവ്വനത്തിന്റെ നഷ്ട്ട സ്വപ്നങ്ങളെ...
ഓർത്തു തേങ്ങി...
എങ്കിലും മനസ്സിലൊരു കുളിർമ...
ഇനി ഞാൻ ചത്ത്‌ പോങ്ങണ്ടല്ലോ...
ആർക്കോ വേണ്ടി ചത്ത്‌ മലച്ച...
എന്റെ ദിനങ്ങളിൽ നിന്നും
എനിക്ക് വേണ്ടി ജീവിച്ചു തീർക്കുന്ന...
ഈ ദിനങ്ങളിലേക്ക്
എന്നെ നയിച്ച
എന്റെ വികൃത ശരീരതിന്റെ
നിഷ്ക്രിയത്വത്തെ ഞാനറിയാതെ...
സ്നേഹിച്ചു ആദ്യമായി...
എനിക്കുവേണ്ടി ബാക്കി വച്ച
തന്റെ പുഴുവരിച്ച സ്വപ്നങ്ങളിൽ
ഞാൻ ആണ്ടിറങ്ങി...
എവിടെയൊക്കെയോ പട്ടു
നൂലിഴകൾ നിർമ്മിച്ച്‌ കൊണ്ടേയിരുന്നു...
വേദനയോടു കൂടി ഞാനത് നോക്കി നിന്ന്...
എം ജി മല്ലിക